Helsefellesskapet skal evaluere strukturen

Over 100 leiarar, fagfolk og samarbeidspartnarar frå kommunar og sjukehus var samla då Helsefellesskapet i bergensområdet inviterte til det fjerde partnarskapsmøtet i Bergen. Partnarskapsmøtet er det øvste nivået i helsefellesskapet og blir arrangert kvart år.

Gjennom ein tettpakka dag leia Eivind Hansen (adm.dir. Helse Bergen og leiar i strategisk samarbeidsutval) og Johnny Breivik (kommunedirektør i Øygarden kommune og nestleiar i strategisk samarbeidsutval) deltakarane gjennom diskusjonar om prioriteringar, utvikling av tenester og felles helseberedskap.

I år blei partnarskapsmøtet arrangert i Bergen sentrum, og Haraldsplass diakonale sykehus var vertskap. 

- Ingen lykkast aleine. Vi treng felles strategi og felles virkeligheitforståing for å lage ein felles vei framover, sa Jørn Henning Theis, styreleiar, Haraldsplass diakonale sykehus og Solli DPS, då han opna møtet.

Ønskjer breitt fleirtal om helsereform

Dagen starta med nasjonale perspektiv rundt samhandling frå regjeringa og KS. For regjeringa er Helsereformutvalet ei svært viktig satsing for å møte fremtidas utfordringar. 

- Å levere ein helsereform er noko av det viktigaste vi skal gjere. Helse- og omsorgstenestene utgjer 400 milliardar, og derfor er det viktig at utvalet får tid, sa Ellen Moen Rønning-Arnesen (Ap), statssekretær i helse- og omsorgsdepartementet.

Ho forsikra om at regjeringa vil byggje vidare på helsefellesskapa og kulturbygginga som skjer der. Trass i delvis dystre spådommar om framtida, la Rønning-Arnesen vekt på at utfordringane let seg løyse.

Helsereformutvalet har fått eit vidt mandat, og Rønning-Arnesen meinte det er naudsynt med ei breitt fleirtal hvis ein skal endre helsetenestene.

Gunn Marit Helgesen (H), styreleiar i KS, påpeikte at det er mykje som fungerer veldig godt.

- Utgangspunktet er at vi har gode helsetenester. Vi må løyse opp i det som ikkje fungerer og byggje vidare på det som fungerer, ikkje lage eit heilt nytt system, sa Helgesen. 

Må være samde om prioriteringar 

Baard-Christian Schem, seniorrådgjevar i Helse Vest, heldt innlegg om prioriteringar. Han la vekt på at tenestene står foran samansette utfordringar framover, der mange kjempar om dei same ressursane.

- Det skjer fleire endringar samtidig. Demografi, andre sektorar med auka behov og medisinsk utvikling med mange nyttige, men kostbare metodar for behandling, sa Schem. 

Han viste til eiga erfaring som kreftlege, og korleis ein også innanfor fagfelt må ha eit breitt perspektiv for å gjere gode prioriteringar. 

Dette var også eit sentralt tema i sesjonen om helseberedskap ved sikkerheitspolitiske kriser og krig. 

- Det skal ikkje vere den enkelte behandlar som må gjere desse prioriteringane. Det bør helst vere både nasjonale og lokale føringar, sa fylkesberedskapssjef Haavard Stensvand.

Fleire meinte at partene må stå saman og prioritere likt.

- Vi må forberede oss på å kunne prioritere tøft. Det vil vere heilt umogleg for den enkelte kommune eller behandlar å stå i dette aleine, sa Kjell A. Wolff, kommunaldirektør for eldre, helse og omsorg i Bergen kommune.

Tiltak for å løyse samhandlingsutfordringar

Fem av dei 13 prosjekta som har fått rekrutterings- og samhandlingstilskot frå helsefellesskapet, presenterte arbeidet sitt i møtet.

Rekrutterings- og samhandlingstilskotet skal fremje innovasjon og nytenking, og bidra til å prøve ut tiltak og prosjekt som har potensial for å løyse samhandlingsutfordringar mellom primær- og spesialisthelsetenesta.  

Felles for prosjekta, er at dei alle er eit samarbeid mellom ein eller fleire kommunar og spesialisthelsetenesta. 

Presentasjon av faglege utval 

Per no er det etablert tre faglege samarbeidsutval i helsefellesskapet, og i tillegg har det eksistert eit medisinskfagleg utval sidan før helsefellesskapet blei etablert. I møtet deltok representanter frå fleire utval i ein dialog om det faglege samarbeidet.

Det fagleg samarbeidet på tvers er viktig for å byggje ned siloar, og dei faglege samarbeidsutvala blir sentrale møteplassar i samhandlingsstrukturen og ei viktig drivkraft i arbeidet med å utvikle meir heilskaplege tenester. 

Både prosjekta og utvala er viktige for å styrke den faglege samhandlinga og for å prøve ut nye samarbeidsformer. 

Skal evaluere strukturen 

Før møtet hadde strategisk samarbeidsutval bedt partnarskapsmøtet om å stille seg bak eit forslag om å evaluere strukturen. 

Helsefellesskapet har i haust eksistert i fire år, og strategisk samarbeidsutval har derfor ønskt å evaluere om strukturen fungerer best mogleg etter intensjonen.

Forslaget fekk tilslutning, og oppdraget er dermed gitt til helsefellesskapet.

Det neste partnarskapsmøtet blir arrangert 11. februar 2027. Då er det kommunane i Voss lokalsjukehusområde som er vertskap.

Sjå heile programmet for dagen her.