Søknadskriterium og modell

1. Formål

Rekrutterings- og samhandlingstilskotet skal fremje innovasjon og nytenking, og bidra til å prøve ut tiltak og prosjekt som har potensial for å løyse samhandlingsutfordringar mellom primær- og spesialisthelsetenesta.  

Alle aktørar i Helsefellesskapet i bergensområdet kan søke om tilskot. Det er eit krav om at alle søknader må bygge på einigheit mellom kommune(r) og sjukehus.

2. Bakgrunn

Regjeringa lanserte i Nasjonal helse- og samhandlingsplan 2024–2027 eit rekrutterings- og samhandlingstilskot. Tilskotsmidlane skal støtte opp under tenesteutvikling og gode pasientforløp gjennom å styrke samhandlinga mellom spesialisthelsetenesta og den kommunale helse- og omsorgstenesta. Midlane skal brukast etter einigheit mellom helseføretak og aktuelle kommunar.   

Tilskotet skal gjere det enklare for kommunar og sjukehus å samarbeide om felles planlegging, tenesteutvikling og gode pasientforløp for dei prioriterte pasientgruppene gjennom helsefellesskapane.  

For Helsefellesskapet i bergensområdet er det eit mål om at rekrutterings- og samhandlingstilskotet skal fremje innovasjon og nytenking, og bidra til å prøve ut tiltak og prosjekt som har potensial for å løyse samhandlingsutfordringar.  

2.1 Nasjonale føringar

Nasjonal helse- og samhandlingsplan 2024–2027 og oppdragsdokument til dei regionale helseføretaka etter revidert nasjonalbudsjett 2024 gir nokre generelle føringar for tildeling av tilskot: 

• Rekrutterings- og samhandlingstilskotet skal støtte opp under tenesteutvikling og gode pasientforløp gjennom å styrke samhandlinga. 

• Særleg prioritert er tiltak og område som kan få ned ventetidene i sjukehus. Prioriterte grupper er dei fire pasientgruppene med samansette behov, og dessutan tenester innanfor svangerskaps-, fødsels- og barselomsorg, integrert psykisk helseteneste og rusteneste, rehabilitering og tiltak for å redusere talet på utskrivingsklare pasientar som blir liggande på sjukehus. 

• Beløpet som blir mottatt i tilskot vil som hovudregel vere ei delfinansiering som supplerer partane sin eigen ressursinnsats. 

• Likeverdigheit mellom kommunar og sjukehus i utarbeiding av forslag til korleis midlane skal nyttast. 

• Midlane skal brukast etter einigheit mellom helseføretak og aktuelle kommunar. Partane skal gjennom avtale gjere tydeleg korleis tiltaket støttar opp om formålet med tilskotsordninga, og korleis ressursinnsatsen til partane i gjennomføring av tiltaket blir balansert mot framtidige innsparingar. 

• Tilskotet kan støtte opp under tiltak som fremjar rekruttering og god bruk av personell i helseregionen på tvers av nivåa, for eksempel utprøving og etablering av kombinerte stillingar. 

2.2 Lokale føringar

Strategien til helsefellesskapet for 2024–2027 og tilhøyrande handlingsplan skal vere ei rettesnor og ei tydeleg føring når søknader om tilskot skal vurderast. Det er i strategien og handlingsplanen at dei prioriterte satsingsområda til helsefellesskapen er nedfelte. 

Følgande er oppført som hovudmål og prioriterte satsingsområde i strategien for Helsefellesskapet i bergensområdet: 

• Sterkare samhandling – ein felles kultur 

• Prioriteringar – kloke val saman 

• Rekruttering og bemanning – smart bruk av kompetansen vår 

• Økonomi – tiltak som gagnar samfunnet 

• Teknologi og digitalisering – løysingar som samsnakkar og avlastar 

3. Kriterium for tildeling av tilskot

Det blir anbefalt at søkar også prøver ut andre finansieringsmoglegheiter gjennom ulike støtteordningar, til dømes helseteknologiordninga, InnoMed, samhandlingsmidlar frå Alrek helseklynge, Såkornmidler, og andre. 

Søknaden må beskrive søkarane sin eigen ressursinnsats, som kan vere i form av personell, økonomiske midlar, innkjøp, utstyr m.m. Det må kome fram i søknaden at den er forankra på nivå 2/kommunalsjefsnivå.

Søknadane vil bli vurdert etter: 

• Samsvar med hovudmåla til helsefellesskapet og prioriterte satsingsområde, jf. overordna strategi og tilhøyrande handlingsplan

• Potensiell samfunnsnytte og overføringsverdi

• Potensialet for å løyse konkrete samhandlingsutfordringar, inkludert utfordringar der pasientar står i fare for å falle mellom kommune(r) og sjukehus. Eit eksempel er tilfelle der tiltak ikkje blir gjennomførte fordi kostnaden kjem på eit nivå i tenestene, mens gevinsten fell til det andre nivået

• Om prosjektet kan bidra til berekraftige helsetenester, for eksempel tiltak som er personellsparande eller som bidrar til anna god ressursutnytting av kompetanse, desentraliserte helsetenester, kutt i reiseveg, rekruttere/behalde personell m.m.  

4. Modell

4.1 Søknadsprosess

Det blir gjennomført éin søknadsrunde per år med søknadsfrist på våren under føresetnad av at det vert overført midlar gjennom statsbudsjettet. Helsefellesskapet kan setje av midlar til seinare år.  

Alle aktørar i helsefellesskapen kan sende søknad, og alle søknader må bygge på dokumentert einigheit mellom kommune(r) og sjukehus.

Søknader som får innvilga tilskot, vil bli omtalte med ei kort beskriving på saman.no.  

Søknadsprosessen skal evaluerast for å sjå om det er behov for endringar i kriterium eller modell.  

4.2 Søknadsbehandling

Ein søknadskomité sett ned av Strategisk samarbeidsutval (SSU) vurderer  søknadane, og sender ei prioritert innstilling til SSU. Strategisk samarbeidsutval vedtar endeleg tildeling av tilskot. 

Søknadskomiteen består av: 

• Leiarar og nestleiarar i dei fire områdeutvala 

• To brukarrepresentantar (éin frå kommunane og éin frå spesialisthelsetenesta) 

• Éin fastlegerepresentant 

• Éin klinikar frå spesialisthelsetenesta 

4.3 Søknadsskjema

Alle søknader skal nytte søknadsskjema på saman.no. Søknadane skal vere kortfatta, men må innehalde tilstrekkeleg informasjon til at dei kan bli vurderte.  

Søknader som ikkje oppfyller desse krava, risikerer å bli avviste. Søknadskomiteen kan be om meir informasjon utover det som er oppgitt i søknad før vedtak blir gjort. 

4.4 Utbetaling av tilskot

Innvilga tilskot vil bli utbetalt på følgande måte:

• Dersom hovudsøkar er ei eining i Helse Bergen, blir utgifter kostnadsførte knytt til tildelt tilskot på prosjektnummer R-11326.  
• Dersom hovudsøkar ikkje er ei eining i Helse Bergen, blir tildelt tilskot utbetalt etter faktura som må merkast med prosjektnummer R-11326.

 4.5 Bruk av tilskot

Tilskotet må brukast i samsvar med søknaden, og tilskotet gjeld for innvilga periode (maksimalt 12 mnd.). Eventuell omdisponering av midlar må bli godkjent på førehand.  

Heile eller delar av tilskotet kan måtte bli betalt tilbake dersom midlane ikkje er blitt brukte i tråd med søknaden eller dersom prosjektet ikkje vert starta innan rimeleg tid (6 mnd.).

4.6 Sluttrapportering

Etter at søknadsperioden er passert, skal ansvarleg søkar for tiltaket sende sluttrapport til Strategisk samarbeidsutval ved hjelp av rapporteringsskjemaet til helsefellesskapen.  

I sluttrapporten skal mottakar av tilskotet vurdere effekten av tiltaket og eventuelle læringspunkt, slik at erfaringane kjem til nytte for andre.  

Samhandlingstilskotet krev ikkje eigen revisjon. Det betyr at midlane vil inngå i ordinær revisjon i organisasjonen som blir tildelt midlar.

Reviderte søknadskriterium ble vedteken av strategisk samarbeidsutval 16. oktober 2025.